Қоғамдық орындардағы қылмыс деңгейі үштен бірге төмендеді. 10 мыңға жуық қылмыс жаппай бейнебақылау арқылы ашылды

Полиция қоғамдық қауіпсіздікті қамтамасыз етуге бағытталған жобалардың ішінде барлық қоғамдық маңызды орындарды жаппай бейнебақылаумен қамтуды ерекше атап өтуде. Көп жағдайда камералар жазбасы құқық бұзушылықтың жалғыз дәлелі болып табылады. Бейнебақылау қылмыстың ізін суытпай ашуға, айғақтарды жинауға ғана емес, оның алдын алуға да көмектеседі. Қазір республика аумағында 625 мыңнан астам бейнебақылау камерасы қолданыста, оның 100 мыңға жуығы Жедел басқару орталығына шығарылған. Бұл туралы Орталық коммуникациялар қызметінде өткен брифингте ішкі істер министрінің орынбасары Сәкен Сәрсенов мәлімдеді.