Қазақстанда 30 ЖОО жасанды интеллект бойынша 38 білім беру бағдарламасын іске асырып жатыр

Мемлекет басшысы өз Жолдауында Қазақстанды үш жыл ішінде толыққанды цифрлық мемлекетке айналдыру жөнінде стратегиялық міндет қойып, ауқымды цифрлық жаңғырту кадрларға, адам капиталына жаңа талаптар қоятынын атап өтті. ҚР Ғылым және жоғары білім министрлігі жаңа білім беру бағдарламаларын әзірлеу барысында тек технологиялық трендтерді ғана емес, еңбек нарығындағы өзгерістерді де ескеріп отыр. Осы мақсатта ведомство жаңа мамандықтар атласы жобасы аясында жасанды интеллектінің дамуына байланысты еңбек нарығындағы өзгерістерге де талдау жүргізді. Бұл жайында ҚР ғылым және жоғары білім вице-министрі Динара Щеглова ОКҚ алаңында өткен баспасөз конференциясында хабарлады.