Басымдық берілетін 60-қа жуық спорт түрі анықталады

Соңғы жылдары спорт саласына жұмсалатын бюджет қаражатын қайта бөлу тенденциясы байқалып отыр. Мұнда басты назар бұқаралық және жастар спортын қолдауға аударылады. Осы орайда кәсіпқой клубтарды қаржыландырудың максималды деңгейі белгіленбек. Ең негізгі жаңалық – 60-қа жуық басым спорт түрінің анықталуы. Олардың арасында Олимпиада, Паралимпиада, Сурдлимпиада, Азия және Паразия ойындарының бағдарламаларына енген спорт түрлері, сонымен бірге, олимпиадалық емес спорт түрлерінен Азия және Паразия ойындарына енген спорт түрлері және ұлттық спорт түрлері толық қарастырылады. Бұл туралы туризм және спорт вице-министрі Серік Жарасбаев ОКҚ алаңында өткен баспасөз конференциясында хабарлады.