Аптаның фейктері: қандай жалған ақпараттар пайда болды және олар не үшін пайда болды?
Өткен аптада қазақстандық интернет сегментінде бірнеше жалған ақпараттар тіркелді.
Солардың ішінде қоғамда резонанс тудырған екі тақырып бар.
Біріншісі, Қазақстанда Whats
App пен Telegram желілерін қолдануға шектеу қойылады деген ақпарат;
Екіншісі, жылжымайтын мүлікке берілетін техникалық паспорттарды міндетті түрде ауыстыру қажеттігі турасындағы хабар.
Анықтай келе, бұл ақпараттардың екеуі де жалған болып шықты.
Құзырлы органдар жедел түрде оларды жоққа шығарды.
Мессенджерлер туралы
Цифрлық даму, инновациялар және аэроғарыш өнеркәсібі министрлігі ресми мәлімдеме таратты: азаматтар үшін шетелдік сервистерді пайдалануға ешқандай шектеу енгізілмейді.
Aitu платформасын енгізу тек орталық және жергілікті мемлекеттік органдар мен квазимемлекеттік сектор ұйымдарының қызметтік байланысына қатысты.
Бұл шешім қызметтік ақпарат алмасуды қауіпсіз етуге, қызметтік мақсаттағы деректерді қорғауға, қорғалған цифрлық ортаға көшуге бағытталған.
Whats App пен Telegram барлық пайдаланушыларға бұрынғыдай қолжетімді.
Техникалық паспорттар туралы«Азаматтарға арналған үкімет» мемлекеттік корпорациясы да түсіндірме берді.
Таралған ақпаратта айтылғандай, барлық үй иелері техникалық паспорттарын кадастрлыққа міндетті түрде ауыстыруы керек деген мәлімет шындыққа жанаспайды.«Құжатты ауыстыру тек екінші деңгейлі банктерге жүгінген кезде (несие, кепіл және т.
б.) немесе нотариус арқылы мәмілелер жасалғанда (олардың талабы бойынша) қажет.
Басқа жағдайларда ауыстыру тек иесінің қалауымен жүзеге асады.
Міндетті талап жоқ»– дейді Мемлекеттік корпорацияның коммуникациялар қызметінің басшысы Асқар Атағұлин.
Мұндай фейктер не үшін таратылады?
1. «Whats App пен Telegram-ға тыйым салынады» деген хабар тарағанда, ол бірден миллиондаған қолданушыға әсер етеді.
Адамдарда алаңдаушылық пайда болады: «Мен жақындарыммен қалай сөйлесемін?
Келесіде не нәрсеге тыйым салады?» Қоғамда дүрбелең пайда болып, қауесет жылдам тарайды.
Адамдар қандай да бір қауіптің алдын алу үшін хабарламаны достарына, әріптестеріне жібере бастайды.
2. «Техпаспорттарды міндетті түрде ауыстыру» туралы фейк азаматтарда «жаңа төлемдер» мен артық бюрократиялық кедергілердің пайда болғаны жайлы әсер қалдырады.
Нәтижесінде мемлекеттік органдарға көпшіліктің реніші мен наразылығы артады.
3. Жағымсыз хабар шынайы ақпаратқа қарағанда тез тарайтынын фейк авторлары жақсы біледі.
Қорқыныш, ашу, реніш сияқты эмоциялар адамдарды ақпаратты тексермей бөлісуге итермелейді.
4. Мұндай жалған ақпараттар жүйелі түрде қайталанғанда, халықта «әрбір жаңа бастама тек проблема тудырады» деген түсінік қалыптасады.
Бұл әлеуметтік шиеленістің артуына және мемлекеттік институттарға сенімнің әлсіреуіне әкеледі.
Сондықтан мұндай жалған ақпарат – жай ғана қауесет емес.
Бұл –қоғам мен мемлекетті қарсы қоюды көздейтін манипуляция құралы.
Жалған ақпаратқа қарсы іс-қимыл орталығы еске салады:Ақпараттың шынайылығына күмән туындаған жағдайда ресми мемлекеттік органдарға жүгініңіз немесе күмәнді ақпаратты бізге жіберіңіз.
Чат-бот - @Anti Fake
Center Bot.